طبعا سمعنا عن برطمان الحزن الوثني الي حصل و طلع ناس كتير بتقول عايزين نعمل برلمان مواز و ناس كتير فرحت بالموضوع و لكن تعرف ازاي نستفيد من البرلمان دا؟ لا طبعا و كتير للأسف أكتر حاجة يعرفوها عن البرلمان المواز انه مش عمودي :D
فيه نوعين من البرلمان : برلمان لشو الاعلامي و برلمان يبقى نوع من حكومة الظل لسحب الشرعية من النظام الأولاني لاثبات التزوير و دا مش محتاجينه و دا يسمى انتخابات رمزية زي المحاكمة الشعبية كدا و خلافه شكل رمزي يبين التزوير الي حصل
طيب هل دا احنا محتاجينه؟؟؟؟
لا طبعا لو سألت أقل عيل في جمهورية القهر العربية مصر حبيبتنا هيقولك مزورة يا باشا
طيب يا جماعة عشان نوري الناس بتوع برة و نثبت انه مزورة و نسحب الشرعية من تحت النظام
ما هو الناس بتوع برة برضه عارفين انها مزورة و بص في جرايدهم واشنطون بوست و نيويورك تايمز و خلافه
طيب عشان نبقى شرعيين مع الشعب ما هو الشعب مش حاسس بيك أصلا عشان تعمل دا و انك تجيب الكلام من النخبة فوق هيكون مجرد انك هيكون عندك دوائر معينة و نخبة احنا حفظناها هتمسك الصدارة
يا عم قفلتها في وشنا طيب نعمل ايه؟؟؟؟؟؟؟؟
والله دا رأي ممكن يكون غلط و ممكن يكون صح و نتناقش فيه مع بعض أنا برضه أخوكم الصغير
مبدئيا عايزين نعمل انتخابات تاني و لكن انتخابات ايه عن طريق الرقم القومي و التصويت الالكتروني
هل هيسمحوا بكدا ؟؟؟؟
احنا مش عايزين أكتر من أننا نثبت شرعية من الشعب فمش هنعملها بمظاهرات و لا مسيرات
كل مرشح موجود هيتحط ليه نصاب معين من الأرقام القومية و الأسماء لازم يعديه عشان يخش الانتخابات و بعد كدا نبتدي و كل الي محتاجينه في دائرة عشان نبدأ الانتخابات فيها أن عدد الأصوات يكون كافي عشان أي مرشح من المرشحين المستقلين أو المحزبين يعدوا بتوع الحزب الوطني
يعني لو بتاع الحزب مثلا واخد 6000 صوت و المرشح بتاع المعارضة جاب 7000 صوت من أرقام قومية صحيحة يبقى المرشح دا متزور ليه رسميا و معانا 7000 رقم قومي يشهدوا انهم عايزين المرشح دا
و هنا بدأنا نجيب الشرعية من الشعب لمجلس حقيقي
و طبعا كل مرشح هيقدم البرنامج بتاعه برنامج حقيقي فعلا ازاي هيحاسب الحكومة على تقصيرها في الدوائر كذا و كذا و هيبتدي يحاول مع أهل دائرته أنه يطبق دا
هي دي الفكرة مبسطة جدا و طبعا لو الفكرة دي نجحت هيكون برلمان زي الفل
و لو فشلت هيكون شو اعلامي و هينجح المرشحين بتوع المعارضة في كذا دايرة و هيحصل الشو الاعلامي بتاع الأول
و دمتم
:D:D
